शुभकामनाका सुखहरु
By Sahadev Poudel
म ,
बर्षौ देखि तिम्रो शुभ-कामना गर्दै छु
दीर्घायु र सु-स्वास्थको प्रार्थना गर्दै छु
आज यो घडीमा एक पटक टक्क अडिएर तिमीलाई हेर्न मन लागेको छ..
बुझ्न मन लागेको छ…
मेरा शुभकामनाका प्रभाबहरु पढन मन लागेको छ.!
मैले सम्झे सम्म तिम्रो सु-स्वास्थ्यको कामना गरी रहेछु
सर्वे:भवन्तु:सुखिन: जपी रहेछु ,
तर तिमी पल पल कमजोर बन्दै गई रहेछौ,
शुभ लाभले बास गरोस चाहना यही गरी रहेछु ‘
तर अपहरण,हत्या र गोलीका छिर्काहरूले तर्साई रहेछन ,
स्वतन्त्र हुनु संसारमा .. कामना यही गरी रहेछु
तर पाईला पाईलामा परिबन्धमा परी रहेछौ!
मेरा निस्वार्थ कामनामा कुनै दोष थिएन
तिम्रो सफलतामा म गर्बनै गर्थे
किनकी,
तिम्रो सुख …मेरो शान्ति थियो
तिम्रो स्वतन्त्रता …मेरो संसार थियो
तिम्रो दीर्घायु ….मेरो आयु थियो
तिम्रो शान्ति …मेरो सुख थियो
तर खै त,
मेरो शुभकामनाका प्रभाबहरु?
यदि मेरो शुभकामनामा साच्चै शक्ति भै दिएको भए,
तिम्रो खबर सुनेर म नाच्नु पर्थ्यो,
मिठो उत्साहका गीतहरु लेख्नु पर्थ्यो
तिम्रो तस्बीर हेरेर म आल्हादित हुनु पर्थ्यो
छातिमा राख्दा मन शान्ति हुनु पर्थ्यो
तिमीलाई मेरो शुभकामनाले प्रभाब परेको भए
तिम्रो आलिन्गनमा बाधिदा
मनले ढुक्क अनुभब गर्नु पर्थ्यो
साच्चै शान्ति हुनु पर्थ्यो
थोरै भए पनि शक्ति संचार तिमीबाट सबैले पाउनु पर्थ्यो!
अब भन म के गरु?
यो साल तिम्रोलागी शुभकामनाका
शब्दहरु कोरु की नकोरु?
